第一次接觸小兒推拿，係中醫本科大學四年級時，
推拿學其中一部分課堂。
無錯，小兒推拿確實係
正式嘅.大學.中醫學科.學院教育制度.入面嘅內容，
但只佔極少部分。
當時學習以理論為主，
亦有一兩節實習見識見識。 只係，對我而言，
小兒推拿不過係一門理論幾有趣，
療效成疑，同埋好多野背嘅偏門知識。 當時嘅我同好多人一樣，
會覺得「就咁按下隻手就醫到病咁神奇？」
「中醫的生命在於臨床」 第一次接觸真正嘅、有生命力嘅小兒推拿，
係大學六年級上廣州實習時，
遇到呢位帶領我進入小兒推拿之門嘅恩師，
呢位就係陳紅蕾老師，
亦即係我師傅。 紅蕾bb佢係廣東省中醫院東區四樓按摩科小兒推拿科主任，
每日都有近100個bb搵佢做小兒推拿。
紅蕾bb係一位年近六旬嘅小朋友，性格可愛，
好受其他小朋友歡迎；
同時佢係一個醉心鑽研學習小兒推拿法嘅醫師，
由山東去到海南，遍尋拜訪每位兒推名老中醫；
更係一位盡顯孔子有教無類，
好願意將佢畢生所學嘅一招一式，
一點點心得都分享出去嘅好老師。 跟住紅蕾bb學習，
我見證住好多個單靠兒推就有好轉，
甚至好返嘅小朋友，一個又一個好消息，
一次又一次成功案例，
每次都增加咗我對小兒推拿嘅信心同敬佩。
跟師過程好有滿足感，一開始睇住師傅佢推好返個bb，
再到師傅佢開方，我睇住佢條方，
由我親手落手幫bb推拿亦見效，
再去到自己有能力同師傅分析討論，
短短一年時間，我由一個對小兒推拿半信半疑嘅學生，
去到畢業論文題目係「小兒推拿流派比較」，
呢一年要感恩遇到呢位恩師，令我進步得好快。
其間亦有一個小插曲，就係我來回香港廣州，
塔高鐵嘅時候，突然聽到廣播，前卡急需醫生到診，
猶豫之下，帶住忐忑不安、
擔心自己應付不來嘅感覺，嚟到事發車卡。
患者原來係一個突發高燒嘅bb，1歲都無，
因為燒到臉頰紅腫，呼吸喘息呼呼。
而原來有一位老伯已早過我到場，治療緊小bb，
果位老頭子正正就用緊小兒推拿一招「清天河水」，
佢腰間掛住支推拿油，運著純熟嘅手法進行治療。
我衝上前，心裡面不禁泛起一陣興奮，
難得偶遇高手，我當然要表明中醫學生身份，
老伯示意一同幫忙，為小朋友係對則手臂一同進行推拿。
大約20min，明顯見到小朋友臉部腫消，
紅色化淡，呼吸亦緩下來......
我大概同無數人分享過呢個故事，因為呢件事實在太深刻，
亦奠定咗我將來想發展小兒推拿嘅決心，
我估唔到，小兒推拿除左治療各種疾病，甚至可以做急救。
畢業後，成為註冊中醫師，
我致力推廣小兒推拿，
由剛畢業留係大學開診，
兩年來有1個bb做過1次小兒推拿，
到柴胡醫館初成立，頭一個月有3個小朋友睇病，
再到依家柴胡醫館成立一周年，
俾胡大夫做過小兒推拿嘅小朋友不下50個，
甚至乎有洛大夫加入，
亦開始使用小兒推拿幫小朋友。
「一個人走得快，一班人走得遠」 我知道，只有我一人之力，時間力量實在有限，
我希望可以推廣小兒推拿文化，
香港每個人都聽過咩叫小兒推拿，
香港嘅中醫師都可以學識小兒推拿技術，
香港嘅小朋友都可以接受更好嘅治療，
唔洗針、唔洗藥，只需要捽下手仔
都可以治療傷風感冒、痾嘔肚痛、脾氣暴躁、發展遲緩
呢個就係香港小兒推拿協會 HKPTNA 成立嘅故事。